అంతర్జాతీయ పవర్ లిఫ్టింగ్ క్రీడాకారిణి సాదియా అల్మాస్‌కు మంత్రి నారా లోకేష్ ఆర్థిక సాయం

 

                                            

మంగళగిరి (గుంటూరు): రాష్ట్ర ఐటీ, మానవ వనరుల శాఖ మంత్రి నారా లోకేష్ మరోసారి తన దాతృత్వాన్ని చాటుకున్నారు. మంగళగిరి నియోజకవర్గానికి చెందిన అంతర్జాతీయ పవర్ లిఫ్టింగ్ క్రీడాకారిణి సాదియా అల్మాస్ కు, కోస్టారికాలో జరగబోయే వరల్డ్ పవర్ లిఫ్టింగ్ ఛాంపియన్‌షిప్‌లో పాల్గొనేందుకు రూ.2.50 లక్షల ఆర్థిక సాయం అందజేశారు.

ఈ నెల ఆగస్టు 24 నుంచి సెప్టెంబర్ 7 వరకు కోస్టారికాలో నిర్వహించే ఈ పోటీల్లో భారత్ తరపున పాల్గొనబోతున్న సాదియా అల్మాస్, మంగళగిరి నియోజకవర్గానికి చెందిన ఏకైక ప్రతినిధిగా నిలుస్తున్నారు.

సాదియా కుటుంబ సభ్యులు మంత్రి నారా లోకేష్‌ను కలిసి ఆర్థిక సహాయం కోరగా, వెంటనే స్పందించిన ఆయన “దేశానికి, రాష్ట్రానికి కీర్తి తెచ్చేలా రాణించాలని” ఆశీర్వదించారు. అనంతరం “ప్రైడ్ ఆఫ్ మంగళగిరి” పేరుతో ఆర్థిక సాయం స్థానిక నాయకుల ద్వారా అందజేయించారు.

ఈ సందర్భంగా సాదియా అల్మాస్ మాట్లాడుతూ – “నా క్రీడా ప్రస్థానంలో ఎప్పటికప్పుడు ప్రోత్సహిస్తున్న మంత్రి నారా లోకేష్ గారికి హృదయపూర్వక కృతజ్ఞతలు” అని తెలిపారు. గతంలో కూడా రూ.3 లక్షలు సహాయం చేసినట్లు గుర్తు చేశారు.

టీటీడీ పాలకమండలి సభ్యురాలు తమ్మిశెట్టి జానకీదేవి మాట్లాడుతూ – “చదువుతో పాటు క్రీడల్లోనూ ప్రపంచ స్థాయిలో రాణిస్తున్న సాదియా ప్రతిభ విశేషం” అని అభినందించారు.

ఈ కార్యక్రమంలో మంగళగిరి మార్కెట్ యార్డ్ చైర్మన్ జవ్వాది కిరణ్ చంద్, పట్టణ అధ్యక్షులు పడవల మహేష్, ఉపాధ్యక్షురాలు వాసా పద్మ, పట్టణ ప్రధాన కార్యదర్శి షేక్ రియాజ్, తోట సాంబశివరావు తదితరులు పాల్గొన్నారు.